भोकयुद्ध (२०५७) कथासङ्ग्रह पहिलोपटक जनमत प्रकाशनले छापेको हो । यसमा सामाजिक, राजनैतिक, वैज्ञानिक र मनोवैज्ञानिक कथाहरू रहेको पाइन्छ । यसको दोस्रो संस्करण २०६५ मा परिवेश प्रकाशन काठमाडौँबाट प्रकाशित भएको छ । यस सङ्ग्रहमा चौबीस कथाहरू समावेश छन् । यी कथामा सामाजिकता, समसामयिकता, यथार्थता, विसङ्गति मुखरित भएको पाइन्छ । यस कथासङ्ग्रहका कथामा सामाजिक र राजनैतिक समस्याहरू, रोग, भोग, गरिबी, शोषण, दमन, अन्याय, अत्याचार, धनी र गरिबको भेदभाव, श्रमशोषण तथा राजनीतिक परिवर्तनकामी पात्रहरूलाई उभ्याइएको छ । यी कथामा कतै राजनीतिक विकृति, कतै प्रशासनिक विसङ्गति, कतै सामाजिक विभेदपूर्ण स्थिति, मानसिक पीडा, विज्ञानको गलत प्रयोग, अमानवीय परिस्थति, शैक्षिक अराजकता जस्ता विषयवस्तुका माध्यमबाट समतामूलक समाज, न्यायपूर्ण शासन व्यवस्था, उज्यालो मानव जीवनको स्थापनामा जोड दिएको पाइन्छ ।