अक्टोपसहरू
अक्टोपसहरू लामो कविता हो । यो पहिलोपटक २०५९ मा जनमत मासिकमा प्रकाशित भएको हो भने २०६१ सालमा विवेक सिर्जनशील प्रकाशनबाट पुस्तकाकार रूपमा छापिएको हो । यो कविता मुक्त गद्य लयमा लेखिएको छ । यसमा कवितामा हुनुपर्ने तत्त्वहरू भाव, लय, भाषा, प्रतीक, बिम्बहरू, अलङ्कार, भाषाशैलीको प्रयोग भएको छ । अनुप्रास र अन्तरअनुप्रासले युक्त काव्यभाव, सुरुदेखि वीररसकै प्रधानता देखिए पनि करुण, अद्भुत, शान्त रसहरूको पनि सामञ्जस्य देखिन्छ । शब्द प्रयोगमा अङ्ग्रेजी आगन्तुक शब्दको सहज प्रयोग देखिन्छ । यसमा अधुनातन मानवप्रवृत्ति र चिन्तनका बिम्बहरू प्रकट भएका छन् । यहाँ अक्टोपसहरूले झैँ विभिन्न रूपरङ फेरेर मानवीय हिंस्रक अक्टोपसहरूले मौका छोपेर शोषण गर्ने, छिर्की हान्ने, रडाको मच्चाउने जस्ता अनैतिक कार्यव्यापार गर्दै मै खाऊँ मै लाऊँ जस्ता प्रवृत्तिको चित्रण गरिएको छ । यसमा देव कोइमीको आवरण चित्र रहेको छ ।