मुसाको बस्ती
मुसाको बस्ती २०६४ सालमा विवेक सिर्जनशील प्रकाशनले छापेको हो । यो कपिल लामिछानेको दोस्रो बालउपन्यास हो । यो बालबालिकाका लागि रोचक, ज्ञानबद्र्धक र उपयोगी छ भने प्रतीकको प्रयोगले गर्दा वयस्कका लागि पनि त्यत्तिकै उपयोगी छ । यसमा समाजमा बसिसकेपछि सबैले समाजको चालचलन, रीतिस्थिति र राम्रा कुराहरूको अनुसरण र पालना गर्नु पर्दछ भन्ने सन्देश छ । चुनचुन मुसा पात्र पुरानो चिन्तन बोकेको सामन्ती सोचग्रस्त भएको पात्र हो भने सामाजिक र व्यावहारिक चिन्तन बोकेको अर्काे मुसा पात्र छुनछुन हो । चुनचुनले आफूले भनेको सबैले मान्नुपर्ने अरूलाई हप्काउने, दप्काउने, काम लगाउने अरूले जोडजाम गरेको खाना खाएर श्रमशोषण गर्ने गर्दा बस्ती नै छोडेर हिँड्नु परेको छ । चुनचुनले नेपालको राजनैतिक र सामाजिक स्थिति, मानव बस्तीको कोलाहल, त्रासदीपूर्ण अवस्था हुँदै गएको आजको यथार्थ घटनाक्रमको प्रतिनिधित्व गरेको छ । यहाँ समूहमा मिलेर बसेमा ठुला समस्या र योजना पनि सजिलै हल गर्न सकिने सन्देश छ ।